Plano nga pagbalhin ni Oliva giprotestahan sa mga kawani

CEBU, Philippines — Gipakita sa mga empleyado sa city hall sa siyudad sa Mandaue ang ilang pagsupak sa tinguha nga pagbalhin ni Mandaue City Treasurer Atty. Regal Oliva.

Ilang gihimo ang silent protest pinaagi sa ilang pagsul-ob og itom atol sa gipahigayon nga flag raising ceremony Lunes sa buntag Hulyo 8, 2024.

Si Atty Jamaal James Calipayan, city administrator sa maong siyudad mipadayag nga ang ilang gihimo maoy pagpakita sa kusganon nilang pagsupak sa lakang tungod kay matud pa si Atty Oliva ang naghupot sa permamenting posisyon isip tresurero sa dakbayan.

Gitataw ni Calipayan nga maayo ang performance ni Atty Oliva isip tresurero ug gumikan sa maayo niyang pamaagi ug polisiya sa pagpadagan sa pamuhis nakita nga miusbaw ang tinuig nga kita sa siyudad sa Mandaue gikan sa P3 bilyones ngadto na sa P7 bilyones.

Nunot niini nadasig usab ang mga magpapatigyon sa pagpatukod sa ilang negosyo sa siyudad nga maoy hinungdan sa nagkadaghan na nga establisamento nga natukod sa dakbayan.

Si Atty Oliva sa iyang reaksiyon ang mipadayag sa iyang pagpasalamat sa gipakitang suporta ngadto kaniya sa mga empleyado sa city hall.

Hinuon iyang gitatatw nga kon mao gayod ang tinguha sa kadagkoan sa finance department nga pagbalhin kaniya andam siya nga motuman apan iyang giklaro adto siya idestino sa mga dagkong siyudad sama sa Manila.

Giklaro ni Oliva nga dako gayod siya og pagtuo nga politika ang nag-unang hinungdan sa pagbalhin kaniya gikan sa siyudad sa Mandaue. (BANAT NEWS)