CEBU, Philippines — Ang kalisod ug bisyo maoy nagtukmod sa usa ka lalaki nga manguha og cellphone sa usa ka arcade sa mall nga nahimutang sa north reclamation area diin nakuhaan kini og live video sa tag-iya sa cellphone. Ang nasikop naila nga si Jeffrey Cabreros residente sa barangay Calamba ug nakuhaan usab kini og armas lakip ang drugas sa mga nagpatrolya nga kapolisan sa Mabolo Police Station sa may Barangay Carreta.
Suma pa Cabreros nga napugos siya pagpanguha og bisan unsa nga butang nga makwartahan aron adunay magamit sa requirements sa iyang anak.
Dugang pa sa maong suspetsado, nakahibalo lang siya nga nag viral siya sa dihang gisultihan kini sa iyang mga anak nga nauwaw kini sa iyang gibuhat tungod kay mahimo silang bugal-bugalan sa ilang mga kaduwa.
Apan gihimakak ni Cabreros nga iyaha ang maong drugas ug armas nga nasakmit.
Giangkon ni Cabreros, nadakpan na usab siya niadtong tuig 2005 tungod gihapon sa kaso sa snatching o pagpangawat og cellphone.
Tukma nga kaso ang gikatakda nga isang-at batok sa suspek nga nagtingkagol na sa Mabolo Police Station.
Samtang gihulagway sa Cebu City Police Office(CCPO) nga dako og tabang ang pag upload sa video nga madakpan nila ang suspek.
Sa laing bahin nailhan sa kapolisan sa Danao City Police Station ang duha sa unom ka mga suspetsado sa pagpangawat sa tindahan og alahas ug cellphone sulod sa usa ka iladong establisamento sa dakbayan sa Danao niadtong Hunyo 20, 2024. Matud ni Police Lieutenant Colonel Ike Arriola, Hepe sa Danao City Police Station gikuha na nila ang sworn statements sa mga saksi aron ma file na nila ang kasong robbery batok sa mga suspetsado ug malutsan sila og warrant of arrest.
Nasuta sa kapolisan nga taga Luzon ang mga suspetsado. Nahibaw-an nga ang usa sa mga suspetsado nadakpan didto sa Luzon niadtong 2020. Wala gisalikway sa kapolisan ang posibilidad nga konektado ang nahitabong kawat sa Danao City sa nahitabong kawat sa Carcar City. Suma pa ni Arriola nga posibileng wala pa kagawas sa Sugbo ang mga suspek tungod kay human sa insidente gialerto dayon nila ang tanang seaports pagawas sa Sugbo apil na sab ang airport. (BANAT NEWS)