Nanghalok sa uyab sa anak napriso

CEBU, Philippines — Natingkagol sa Mabolo Police Station ang usa ka 46-anyos nga lalaki human niini gihalokan ang nawong sa uyab sa iyang anak kagahapon sa hapon, insidente nahitabo diha sa Barangay Busay, Siyudad sa Sugbo.

Ang suspetsado mao si Samuel Gador, residente sa naasoy nga lugar samtang ang biktima usa ka 18-anyos nga dalaga ug uyab sa anak ni Gador.

Si Gador nangangkon nga nagtuo siya nga iyahang asawa ang naghigda sa ilawom sa katre hinungdan nga iyaha kining giduol og gihalokan sa nawong.

"Paglili nako’s sulod abi ko’g akong pares (asawa) natulog kay usahay akong pares mopauli na anha man na sa ilawom sa katre maghigda-higda", pangangkon ni Gador.

Giangkon ni Gador nga niadtong higayona nakainom siya og ilimnong makahubog.

Ang biktima dali kining nibarog ug nisumbong sa iyang uyab ug gi-report ang hitabo ngadto sa ilang barangay ug gisikop sa mga tanod ang suspetsado ug gitugyan sa Mabolo Police Station.

Ang biktima nipasangil nga gigakos ug gihalokan siya sa suspetsado sa liog ug gi-lock ang pultahan sa kwarto.

Apan ang suspetsado nihimakak sa maong pasangil batok kaniya hinuon giangkon niini nga iyahang gihaloka ang dalaga.

"Ingon nila nga nang rape, ako lang gi-kiss-san kay tuo ko’g akong pares naghigda mao tong akong gi-kiss-san deretso", pangangkon ni Gador.

Dugang ni Gador nga mangayo unta siya og pasaylo sa biktima apan wala kini mopakita kaniya diha sa police station. — John Mark P. Dejito (BANAT NEWS)