CEBU, Philippines — Mokabat sa P4.234 milyones ang nakolekta sa kagamhahan sa Siyudad sa Lapu-Lapu sulod sa duha ka bulan nga pagpatuman sa P100 nga environmental fee.
Subay sa natala nga datus sa City Treasurer’s Office (CTO) nga maoy gihatagan og kaakohan sa pagkolekta sa gipatuman nga ordinansa mokabat sa P2,088,290 ang nakolekta sa buwan sa Mayo ug P2,146,635 sa buwan sa Hunyo.
Sa nasayran sukad gipatuman ang ordinansa sugod niadtong Mayo 1, 2024 ang tanang local ug international nga turista nga mopahigayon og water sports ug ubang kalingawan sa dagat sama sa scuba ug freediving, jet skiing, banana boat riding, sea-walking, parasailing, kayaking ug island hopping, ug uban pa ang gikinahanglan nga mobayad og a P100 environmental fee.
Si Emeterio Bonghanoy pangulo sa Lapu-Lapu City Environment and Natural Resources Office (Cenro) miingon nga ang nakolekta nga salapi mao usab ang gamiton sa mga programa nga naglambigit sa pagprotihir sa kalikopan.
Dugang niini siya miingon nga nagplano sila sa pagtukod og tourist hub sa Maribago ang usa sa upat ka port nga gitagana alang sa collection sa environmental fee.
Ang ubang mga port mao ang nahimutang sa Angasil, Punta Engaño ug Marigondon.
Dugang pa ni Bonghanoy nga ang maong pasilidad adunay waiting lounge nga dunay comfort rooms ug aron adto makapahuway ang mga turista. (BANAT NEWS)