Garcia nahinangop sa suporta nga gihatag sa probinsiya sa Palaro

CEBU, Philippines — Daku ang pasalamat ni acting Cebu City Mayor Raymond Alvin Garcia ngadto sa kagamhanan sa Probinsiya sa Sugbo nga gipanguluhan ni governor Gwendolyn Garcia sa gihatag niini nga donasyon alang sa mga kalihukan sa Palarong Pambansa.

Sumala pa ni acting mayor Garcia nga nalipay siya tungod kay nagpakita lang kini nga ang Cebu adunay panaghiusa ug andam kanunay ang tanan nga magtinabangay.

“Nalipay kaayo ta. Nagpakita gyud ni nga ang Cebu is really united; nga anad ta nga magtinabangay kanunay. Nindot kaayo nga show of unity” pagbasa sa iyang post sa facebook.

Gipadayag usab sa acting mayor ang iyang pasalamat ngadto sa tanan nga nisuporta aron molampos ang kalihukan.

Apil na ang suporta gikan sa mga local nga kagamhanan sa Mandaue ug Lapu-Lapu, mga pribadong sector ingon man ang kahago sa matag usa nga nitabang apil ang mga kawani sa city government ug sa Department of Education

Sa nasayran ang kagamhanan sa Probinsiya sa Sugbo misanong nga mao usab ang mo host sa closing ceremony sa Palaro karong Hulyo 16 ug mipasalig nga mohatag og P8milyones nga ayuda alang sa dugang galastuhan sa pagpahigayon sa dakung kalihukan sa paugnat sa kusog dinhi sa dakbayan sa Sugbo. (BANAT NEWS)