CEBU, Philippines — Nikabat ngadto sa P6.1 milyones ang balor sa shabu nga nasakmit atol sa gipahigayong buy-bust operation sa Drug Enforcement Unit sa Talisay City Police Station pinangulohan ni Police Lieutenant Colonel Epraem Paguyod diha sa Sitio Lower Linao, Barangay Linao, Siyudad sa Talisay kagahapon sa hapon.
Ang nasikop mao si Alma Valles Basco, 53-anyos biyuda, online seller, residente diha sa Sitio Mollila sa naasoy nga barangay.
Si Basco nangangkon nga gikan sa iyang anak nga gihinganlan og “Junior” ang maong drugas ug igo lang kining gibilin kaniya ug wala na siya nakahibawo kong asa na paingon ang iyang anak.
Sa wala pa gipahigayon ang operasyon ang kapolisan nakadawat og taho kabahin sa ilegal nga kalihokan sa suspetsado hinungdan nga gipanid-an nila kini.
Nasayran nga nga gikan sa Abuyog Leyte ang drugas nga ilang nasakmit diin ang suspetsado lumad kining taga St. Bernard, Southern Leyte ug nagpuyo na karon sa Dakbayan sa Talisay.
Ang suspetsado giingong makabaligya kini og 100 ngadto sa 200 gramong shabu matag semana.
Gikataho nga ang anak ni Basco maoy nisugo kaniya kong asa ihatud ang mga shabu nga nasakmit.
Atol sa maong operasyon nakuha sa posisyon sa suspetsado ang siyam ka dagkong putos nga shabu nga nitimbang ngadto sa 900 gramos ug nikantidad tanan ngadto sa P6,120,000 diin gisulod kini sa itom nga shoulder bag, buy-bust money ug usa ka cellphone nga maoy gigamit sa ilegal nga transaksiyon.
Ang suspetsado gibalhog karon sWa custodial facility sa Talisay City Police Office ug gikatakdang pasakaan og kasong kalapasan sa Section 5 ug 11 Article II sa Akta Republika 9165 kun “Comprehensive Dangerous Drugs Act of 2002. (BANAT NEWS)