Suroy-Suroy Sugbo himoon  sa Midwest Cebu karong buwana

CEBU, Philippines — Gikatakda ang sunod nga Suroy-Suroy Sugbo karong bulana kon diin ang mga lungsod ug siyudad sa Midwest Cebu ang mahatagan og higayon nga mobida sa ilang tourismo ug kultura.

Gitawag nga “The Best of the West” ang maong tourism caravan nga gikatakda sa Hulyo 12 ngadto sa 14 diin ang mga partisipante makasinati sa nagkadaiyang kultura ug makalantaw sa mga sikat nga suroyanan sa mga lungsod sa kasadpang Sugbo.

Si Gobernador Gwendolyn Garcia nakigtigom na sa mga mayor sa pito ka lungsod ug siyudad sa midwest Cebu aron hisgotan ang mga angay nga pangandaman sa tulo ka adlaw nga tourism caravan.

“We are now setting the standard. Do it the Cebuano way” matud ni Garcia sa mga mayor.

Ang Kapitolyo naghatag og P500,000 matag usa sa mga LGUs isip subsidiya sa ilang himoon nga preparasyon.

 Atol sa ilang tigom kagahapong adlawa, ang mga LGUs gihagit sa Kapitolyo nga ipakita ang “the best” sa ilang mga lungsod aron nga matagbaw ang mga bisita sa Suroy-Suroy.

Ang mga partisipante, gipaabot nga makasuroy sa Capilla Santa Ana Museums ug Labyrinth sa Toledo. Makatilaw usab sila sa sikat nga kape sa Tuburan, ug makasuroy sa ecotourism destination sa Aloguinsan nga mao ang Bojo River Cruise ug Hermits Cove.

Makatilaw usab og lamian nga culinary delights o pagkaon ug delicacies ang mga bisita gikan sa mga lokal nga produkto sa mga lungsod sama sa bingka dawa sa Asturias.

Ang mga moapil sa Suroy-Suroy Sugbo mamahimong mokuha sa tour package nga ang bayad magdepende sa akomodasyon nga kuhaon sa guest. (BANAT NEWS)