Talisay Rondalla nga naapil sa Guinness World Records gipasigarbo
CEBU, Philippines — Gipasigarbo ni Talisay City mayor Gerald Anthony “Samsam” Gullas ang kalamposan sa Talisay Rondalla nga nahimong kabahin sa Largest Rondalla Ensemble sa Guinness World Records.
Sa nasayran niadtong Hunyo 28, 2024 gihimo ang performance sa nagkalain-laing team sa rondalla sa Central Visayas nga moabot sa kapin sa 500 ka participants diha sa Mandaue City Sports Complex alang sa pagkuha sa Guinness record.
Ang Talisay Rondalla gilangkuban sa mga tinun-an sa Pooc National Highschool nga gi-trained aron mosalmot sa gipasiugdahan sa Department of Education region 7 nga Let's Play Schools alang sa largest rondalla ensemble.
“I am extremely proud of our Talisay City students for being part of the team setting the record as the Largest Rondalla Ensemble” suma pa ni Gullas sa iyang FB post.
Dugang sa mayor nga ang maong kalamposan sa mga tinun-an daku nga garbo sa dakbayan sa Talisay.
Gipasalamatan ni Gullas si coach Humildad P. Daclan gumikan sa paghatag og giya sa mga tinun-an sa ilang performance.
Si Gullas nitataw nga si kanhi mayor Eduardo Gullas ni donate kaniadto sa mga instrumento nga gipang gamit pa karon sa kabataan hangtud nga gipasa-pasa nalang kini ngadto sa laing henerasyon.
Dugang pa niya nga angay lang nga maila ang Talisay Rondalla sa tibuok kalibutan dili lang sa kadugay na sa ilang instrumento kundili sa ilang dedikasyon ug kaikag sa pagpakita sa ilang talento sa natad sa rondalla. (BANAT NEWS)
- Latest