CEBU, Philippines — Nasikop sa niadtong Martes sa hapon sa City Intelligence Unit sa Mandaue Police Office ang usa ka 66-anyos nga senior citizen kinsa nagtago-tago sulod sa 29 ka tuig tungod sa kaso niining murder .
Si Police Lieutenant Colonel Wilfredo Alarcon ang nangulo sa operasyon batok sa suspetsado.
Ang suspetsado nihangyon nga dili ibutyag ang iyang pangalan, lumad nga taga Barangay Balas, Lungsod sa Aurora, Probinsiya sa Zamboanga del Sur.
Si Police Master Sergeant Retchie Codeniera, warrant server sa MCPO maoy nitunol sa warrant of arrest sa suspetsado kinsa diha sa gitrabahoan niining yarda nga nahimutang sa dalan M.L. Quezon avenue, Barangay Maguikay, Siyudad sa Mandaue.
Ang kasong pagpatay nahitabo sa ilang dapit niadtong tuig 1995 ug si Regional Trial Court (RTC) Judge Laurito Quinto sa Branch 30 nga nagbase sa Probinsiya sa Zamboanga del Sur maoy nagluwat sa warrant of arrest batok sa suspetsado.
Giingong ang suspetsado nangangkon nga ang iyang kauban maoy nipusil patay sa biktima nga ilahang silingan human kini mailogi sa armas.
Human sa maong hitabo dali silang nisibat paingon sa Siyudad sa Sugbo ug padayon nga nagtago-tago.
Ang gitumbok nga kauban sa suspetsado ang nagpabilin pa kining gawasnon ug padayon pa nga gipangita sa kapolisan. (BANAT NEWS)