Kapin P1.3 bilyong cash aid nahatag sa DSWD sa apektado sa El Niño

CEBU, Philippines — Mokabat sa kapin P1.37 bilyon nga cash assistance ang nahatag sa Department of Social Welfare and Development (DSWD) ngadto sa mga mag-uuma ug mangingisda nga naapektuhan sa El Niño.

Ang nakapahimulos sa maong cash assistance kay gikan sa 17 ka lungsod sa Cagayan Valley ug ubang rehiyon sa Visayas ug Mindanao.

Nagkanayon si DSWD Asst. Secretary for Disaster Response Management Group (DRMG) Irene Dumlao nga kini kabahin sa Presidential Assistance to Farmers, Fisherfolks, and their Families (PAFFF) ni Presidente Ferdinand R. Marcos Jr. diin gitumong sa pagtubag sa mga epekto sa El Niño, ilabina sa sektor sa agrikultura ug pangisda.

Gibutyag ni Asst. Secretary Dumlao, kinsa mao usab ang tigpamaba sa DSWD, nga mokabat sa 137,333 ka mga benepisyaryo gikan sa mga piniling sektor ang gihatagan ug Php10,000 matag usa ubos sa Ayuda sa Kapos ang Kita Program (AKAP) sa ahensya.

Ang AKAP mao ang bag-o lang gilusad nga programa sa DSWD nga naghatag ug social aid sa mga indibiduwal nga mahimong walay access sa regular nga hinabang tungod kay dili sila sakop sa pinakapobre nga populasyon.

Sa kinatibuk-an nga kantidad sa hinabang, ang Cagayan de Oro sa Northern Mindanao nakadawat sa labing dako nga tipik nga dul-an P113.8 milyones alang sa 11,385 ka beneficiaries.

Kahinumduman nga atol sa PAFFF distribution niadtong Hunyo 28, 2024 didto sa Tagbilaran City, Bohol, miingon ang presidente nga iyang gipalapdan ang tahas sa DSWD nga dili lang paghatag og hinabang panahon sa bagyo ug uban pang kalamidad.

Matud niya, ang bag-o lang nga nasinati nga El Niño ug hulaw sa tibuok nasud, usa usab ka krisis mao nga anaa ang DSWD aron motabang ug mohatag og hinabang sa mga naapektuhan ug naglisud tungod sa epekto sa El Niño. Gawas sa cash assistance, naghatag usab ang DSWD og family food packs (FFPs) sa mga pamilya ug indibidwal nga naigo sa El Niño sa tibuok nasud.

Samtang hugtanon nga paluyohan sa buhatan sa Department of Social Welfare (DSWD) ang kagamhanan sa siyudad sa Mandaue sa mga programa ug kalihokan nga nagkinahanglan og tabang sa nasudnong kagamhanan.

Kini ang gipadayag ni DSWD Secretary Rex Gatchalian sa iyang pagbisita sa buhatan ni Mayor Jonas Cortes niadtong miaging adlaw.

Matud pa niya nga ang DSWD andam kanunay sa pagtabang sa siyudad sa mga panahon sa panginahanglan niini.

Gipasalig niini nga lig-onon pa sa DSWD ang pagpakig-alayon sa kagamhanan sa maong siyudad ingon man sa uban pang sektor alang sa gitinguhang kalamboan sa katawhan.

Subay niini gihangop ni Mandaue City mayor Jonas Cortes ni Secretary Gatchalian sa ilang siyudad. (BANAT NEWS)