Enrollment magsugod na karon
CEBU, Philippines — Magsugod na karong adlawa, Hulyo 3, 2024 diin hangtud kini sa Hulyo 26, 2024 ang enrollment sa mga pampublikong eskwelahan ug community learning centers (CLCs) base sa anunsiyo sa Department of Education (DepEd).
Base sa DepEd memorandum No. 032, s. 2024 nga ang pagpa-enroll sa mga publikong tunghaan sa elementarya ug segondarya, lakip ang mga CLC mamahimong ipahigayon pinaagi sa in-person enrollment; remote enrollment sama sa short messaging services (SMS) ug uban pang messaging applications o email gamit ang opisyal nga numero/account o email address sa eskwelahan ug drop box enrollment.
Apan ang mga pribadong eskwelahan, estado/lokal nga unibersidad ug kolehiyo SUCs/LUCs ug Philippine Schools Overseas PSOs nga nagtanyag sa batakang edukasyon mahimong mosagop sa ilang kaugalingong pamaagi sa enrollment ubos sa charter ug mga polisiya sa DepEd.
Kinahanglang i-report nila ang opisyal nga enrolment ngadto sa ilang division offices sa Hulyo 22, 2024.
Samtang ang mga PSO kinahanglang mosumiter og datos sa Private Education Office (PEO).
Sa pagpa-enroll, gikinahanglan ang Basic Education Enrollment Form alang sa tanang pampublikong eskwelahan sa elementarya ug segundarya alang sa umaabot nga kindergarten, grade 1, 7, ug 11 nga enrollees, ug transferee samtang ang confirmation slip gikinahanglan alang sa grade 2 ngadto sa grade 6, grade 8 ngadto sa 10, ug Grade 12 enrollees aron makompirma ang ilang enrollment.
Samtang sa Modified Alternative Learning System (ALS) enrollment form ang alang sa ALS enrollees.
Sa laing bahin, sa gisubli sa Basic Education Policy nga kong walay Philippine Statistics Authority (PSA) birth certificate, mahimong isumiter ang birth certificate (late registration) gikan sa local civil registrar o barangay certification nga adunay sulod sa batakang impormasyon sa bata sama sa (a) ngalan sa bata (first name, middle name, last name); (b) ngalan sa mga ginikanan; (c) petsa sa pagkatawo; ug (d) gender.
Gipahinumduman usab sa DepEd ang tanan nga gidili ang payment collections isip pre-requisite sa pagpa-enroll sa mga tinun-an ilabina sa mga pampublikong tunghaan.
Opisyal na nga magsugod ang school year 2024-2025 sa Hulyo 29 tulo ka adlaw human sa kataposang adlaw sa enrollment ug matapos kini sa Abril 15, 2025. (BANAT NEWS)
- Latest
