Mga drug cleared barangay nakadawat og tag P100 mil

CEBU, Philippines — Ang chairman sa City Anti-Drug Abuse Council Ernest Herrera nagtuo nga madasig ang mga barangay nga mamahimo unya nga drug cleared barangays ug mapili isip best Barangay Drug Abuse Council (BADAC) kini human nadawat ang financial incentive.

Matud ni Herrera nga ang Cebu City Government nitunol ug P100 mil ngadto sa 12 ka barangay nga gideklara nga drug cleared barangays sa Regional Oversight Committee 2023 ug laing 10 ka barangay isip Best Barangay Anti-Drug Abuse Council sa DILG, COSAP ug PNP.

Ang pagpanghatag sa cash incentives gisaksihan nila ni Acting Cebu City Mayor Raymond Alvin Garcia, DILG City Director Dr. Nelia Nijaga-Aquino, Cebu City Police Office Director Police Colonel Ireneo Dalogdog, PDEA ug Regional Director Emerson Margate ug City Councilor Joel Garganera.

Ang gideklara nga best BADAC 2023 naglangkub sa Punta Princesa, Adlaon, Agsungot, Kasambagan, Kamagayan, Kalubihan, Basak San Nicolas, Basak Pardo, Cambinocot ug Tisa.

Samtang ang Drug Cleared Barangays 2023 mao ang Kalubihan, Agsungot, Mabini, Budlaan, Adlaon, Kasambagan, Punta Princesa, Tabunan, Kamagayan, Binaliw, Cambinocot, ug Zapatera.

Matud ni Herrera nga padayon ang pagtuyok-tuyok sa matag sitio sa siyudad aron hisgotan ang problema sa ilegal nga drugas.

Sa laing bahin, nikabat ngadtgo sa P1 milyon ang kantidad sa shabu nga nasakmit gikan sa 53  ka pusher nga nadakpan sa kapolisan sa Lapu-Lapu City Police  Office (LCPO) sa tulo ka adlaw nga Simultaneous Anti- Criminality Law  Enforcement Operation (SACLEO)  nga  nagsugod  sa Hunyo  27  hangtud sa Hunyo 30, 2024. Si  Police  Colonel  Ali Baron,  direktor  sa LCPO nagkanayon nga ang pagkasikop  sa maong  mga pusher resulta sa gihingusgan nilang monitoring sa kabangayan batok sa mga ilegal nga kalihokaan.

Lakip  sa mga nadakpan ang 14 ka street level  individual nga ilang nakuhaan og 142.69 gramo nga shabu  nga nikantidad tanan ngadto sa P970,292. Nasikop usab ang 15 ka sugarol ug nasakmitan og P2,078 nga kwarta ug gambling paraphernalia.                         

Samtang lima ka armas  nga walay lisensiya  ang ilang nasakmit sa  tulo ka adlaw nga SACLEO. (BANAT NEWS)