CEBU, Philippines — Dili mominos sa P2.5 milyones ang danyos sa sunog nga niulbo sa Sitio Bagumbayan sa Barangay Maribago, Dakbayan sa Lapu-Lapu kagahapon sa kaadlawon adlaw nga Martes.
Ala- una sa kaadlawon nadawat sa bombero ang alarma ug na fire out kini paglabay og usa ka oras ug tunga ug unom ka balay ang naugdaw ug duha sab ang nakan-an sa kalayo. Pito ka pamilya o 40 ka tawo ang apektado.
Ang sunog giingong nagsugod sa panimalay ni Melody Omongos ug gisubay pa ang hinungdan niini.
“Around 12:55AM kay nigawas kos amoa unya nahibong lang ko kay ni itom man ang langit so dali-dali intawn ko’g pukaw sa akong manghud kay akong pa chattan iyang amega which is ang balay nila duol jud kaayos nasunogan,” asoy ni Judy Ann Daño, usa sa mga saksi sa panghitabo nga nakahinabi sa Banat News. Wala hinooy gikataho nga nakalas o naangol atol sa pag-ulbo sa maong sunog.
Matud ni Barangay Kapitan Russel Abing mohatag sila’g hinabang sa mga nasunogan.
“Sa among nasabutan sa council, mopalit mi og bugas na lang para ihatag sa matag bubong, kay bali mani og pito ka pamilya, so, mao nay among na come up sa (barangay) provide-an namo og bugas ug kanang canned goods ug noodles,” sigon ni Abing. — Romeo T. Limpangog, Irish L. Laborte, John Mark P. Dejito (BANAT NEWS)