Gipatay tungod iyang kanding nakadasmag

CEBU, Philippines — Usa ka senior citizen ang gipusil patay sa duha ka mga batan-on gumikan lang sa kanding niini nga nadasmagan sa motor sa duha, wala ra maunsa ang kanding apan naguba sa headlights sa motor sa mga suspek ug gusto nila kining pabayran.

Nahitabo kini sa Barangay Calangang sa Lungsod sa Badian niadtong Biyernes sa gabii, Hunyo 28, 2024.

Giila ang biktima nga si Martin Caingcoy, 66 anyos, tag-iya sa nabanggaan nga kanding ug residente sa naasoy nga lugar.

Samtang ang mga suspek 18 anyos ug   24 anyos parehong residente sa lungsod sa Alegria kinsa nadakpan sa hot pursuit operation sa kapolisan sa Badian diha sa Mandaue City kagahapon sa alas 5 sa buntag pinaagi sa tabang sa Police Station 3 sa Mandaue City Police Office.

Matud pa ni Police Captain Jerwin Mark C. Battung sa wala pa ang pagpamusil nadasmagan sa mga suspek ang kanding sa biktima ug naguba ang headlight sa motor nianang alas-6 sa gabii.

 “Actually nagkaroon sila ng kunting argument dahil itong suspek natin is nasagasaan niya ang kambing ng victim. Nagalit yung victim tuloy kasi nasagasaan yung kambing, and then, pero ang nangyari hindi namatay ‘yung kambing. Ang nasira is ‘yung headlight nu’ng motor nuong suspek. So sinisingil sila ngayon ng suspek ng 1,500 para daw sa damage nu’ng motor,” sigon ni Battung sa Banat News.

Matud pa nagkatinubagay ang duha ka habig ug nagkasabot nga adto nalang sila maghusay sa barangay ug dihadiha nipahawa ang mga suspek.

Apan nianang pagka-alas 7 sa gabii nibalik ang mga suspek sa lugar ug gipangita ang biktima kay matud pa mangayo sila og pasaylo kaniya, apan sa dihang niduol ang biktima gikatahong kalit kining gipusil sa dughan.

Gidali og dala sa Badian District Hospital ang biktima apan gideklaara nga dead on arrival na kini.

Ang mga suspek daling mikagiw apan dunay nakatug-n sa kapolisan nga naa sila nitago sa Mandaue City hinungdan nga gipangita sila sa mga polis inabagan sa MCPO hangtud nga sila nadakpan. Matud pang Battung desididong mopasaka og kaso ang banay sa biktima batok sa duha.

Kasong murder ug kalapasan sa Comprehensive Firearms and Ammunition Regulation Act ang ipasakang kaso batok sa mga suspetsado nga nagtingkagol na karon sa prisuhan. — John Mark Dejito (BANAT NEWS)