Papel sa siyudad sa CCSC gituki kay ang luna gipanag-iya sa ANS

CEBU, Philippines — Usa ka magbabalaod sa Cebu City Council nikuwestiyon karon sa papel sa kagamhanan sa dakbayan sa Cebu City Sports Center (CCSC) human makita ang giingong deed of donation nga nagpaluyo sa pagpanag-iya sa Abellana National High School sa maong luna. Gipadayag ni Konsehal Pastor “Jun” Alcover atol sa iyang privilege speech sa regular session niadtong Miyerkules, Hunyo 27, 2024 nga kini nga mga pangutana naggumikan sa sunod sunod nga diskusyon sa mga miyembro sa Abellana National School Alumni Organization.  Dugang pa niya, adunay "clamor" sa pagpanag-iya sa lote nga gibarogan sa CCSC.

Si Alcover, kinsa usa sa mga founder sa maong organisasyon, nipadayag usab sa iyang personal nga kasinatian sa mao nga yuta nga kaniadto ilang duwaanan panahon sa iyang iyang high school days.

“Ang concern sa kasagarang miyembro sa maong organization mao ang pagkuha balik sa control ning yuta nga gipanag-iya sa Abellana National School nga nahimutangan sa Cebu City Sports Center,"matud ni Alcover.Iyang gipasabot nga kini nga pag-angkon gipaluyohan sa usa ka giingong Deed of Donations nga gitugutan sa konseho sa siyudad niadtong 1963 ug 1973.

Gitumong ni Alcover ang Cebu City Council Resolution No. 941 nga pinetsahan og Agosto 5, 1963, nga nag-ingon: “To authorize His Honor, the Mayor, for and on behalf of the City of Cebu, to donate the following parcels of land as sites for the proposed construction of four buildings of the Abellana National School, with a total area of Eight Thousand Four Hundred Twenty-Five (8,425) square meters".

Laing citation sa Cebu City Council Resolution No. 697 pinetsahan og Septembre 18, 1973, nag-ingon usab nga adunay probisyon nga nagtugot sa mayor, sa ngalan sa Dakbayan sa Sugbo, sa pagpatuman ug pagpirma sa Deed of Donation pabor sa Abellana National School.

"Kung ang Abellana National School ang tag-iya sa maong luna nga nahimutangan sa Cebu City Sports Center, unsa man ang role sa Cebu City Government ani?" sigon ni Alcover

Nangayo sab siya og katin-awan sa maong butang ug midugang nga aduna nay daghang mga enhancement nga gihimo sa CCSC.

"Unsay epekto ani sa mga improvements ug mga fees nga gi-collect sa management sa City Sports Center? Kinsay naay control sa mga fees nga gibayad sa mga users ning maong facilities?" suma pa sa konsehal. —MEL BANAT NEWS