CDRRMO miawhag  sa pagpabakwit sa mga residente

CEBU, Philippines — Gibalay-balay og awhag sa mga personnel sa Cebu City Disaster Risk Reduction and Management Office (CCDRRMO) ang mga residente sa Sitio Upper Laguerta Tarcom, Barangay Lahug, Siyudad sa Sugbo nga apektado sa pagdahili sa yuta nga mobiya sa ilang pinuy-anan gumikan kay nabutang sila sa peligro.

Giingong adunay mga residente ang naglangan sa ilang pagbiya tungod kay aduna pay gipang-atiman.

Niadtong Martes sa buntag nangatagak ang mga dagkong bato diha sa lugar diin adunay balay ang naapektohan.

Gipasabot ni Harold Alcontin, pangulo sa CCDRRMO nga gikinahanglan nga biyaan sa mga molupyo ang dapit samtang nasinati ang pag uwan-uwan.

Gi-cordon na usab ang dapit ug pabantayan og mga tanod ug mo-request sila sa kapolisan nga motabang sa pagbantay.

Matud ni Alcontin nga ang mga anapog nga giabuno sa usa ka pribadong establisamento sa ibabaw nga bahin ang naapektoohan sa uwan ang hinungdan nga natumpag ang concrete wall ug padong na nga matagak sa ubos nga bahin diin adunay mga pinuy-anan.

Gipahiluna ang mga apektadong residente sa mga modular tent diha sa covered court sa Sitio Upper Laguerta Tarcom.

Si Portia Basmayor sa City Social Welfare and Development nagkanayon nga nanghatag sila og pagkaon ug bugas sa mga naapektohan sa pagdahili sa yuta aron adunay makaluto. (BANAT NEWS)