Garcia makigtigom sa opisyales sa task force

CEBU, Philippines — Si Cebu City Acting Mayor Raymond Alvin Garcia makigtigom sa mga hingtungdan nga opisyal sa kagamhanan sa Dakbayan sa Sugbo ilabi na sa task force kalabot sa baha matag semana aron mahatagan og igong pagtagad ang suliran sa pagbaha sa siyudad.

Apil unya sa tigom nga iyang ipatawag ang national line agencies sama lakip niini ang Department of Public Works and Highways, nagdumala sa Cebu Bus Rapid Transit project ug uban pa.

Niadtong Martes nakigtagbo si Garcia sa pangulo sa Department of Engineering and Public Works, Cebu City Transportation Office, Division  for the Welfare of Urban Poor, Task Force Chief Implementer, Konsehal Jerry Guardo ug uban pa.

Ang hepe sa DEPW Engineer Norman del Mar gipaabot ni Garcia nga makaduso sa iyang report kalabot sa ilang mga gipanghimo ilabi na sa mga dapit nga nagkinahanglan og dinalian nga pagtagad tungod kay bahaonon.

Gusto ni Garcia nga adunay meeting matag semana aron makahatag og kalamboan ang mga opisyal aron aduna sila’y kapasikaran sa mga gihimo sa pagsulbad sa problema sa baha sa siyudad.

Gisugyot usab ni Garcia nga mo abang lang una og de-clogging machine tungod kay kinahanglan kaayo kini panahon sa ting-uwan tungod kay malangay pa ang pagpalit niini gumikan kay moagi pa man kini og taas nga proseso.

Sa laing bahin, gipaalerto sa pagbantay sa tubig-baha ang mga sakop sa Barangay Emergency Response Team ug ingon man ang Taskforce APAS sa Siyudad sa Mandaue.

Tumong sa gihimong higpit nga pagbantay sa mga dalan nga kanunay’ng makasinati og mga pagbaha aron kapugngan ang gagmay nga mga sakyanan nga makaingon sa pagbara sa dalan sa higayon mapawong ang makina tungod kay malumos sa tubig. Ang mga dagkong sakyanan mao lang ang tugotan sa pag-agi diha sa mga dalan nga bahaan. —Jessa Grezil S. Bacus, Romeo T. Limpangog (BANAT NEWS)