CEBU, Philippines — Nadakpan ang usa ka 26-anyos nga lalake human kini gi-alarmahan sa kapolisan sa Police Station 5 sa Cebu City Police Office (CCPO) kay armado diha sa sitio Tumoy, Barangay Pahina Central, siyudad sa Sugbo, Martes sa gabii.
Ang dinakpan mao si alyas Mahal, residente sa A. Lopez Street, Barangay Labangon ning siyudad.
Nakuhaan ang suspetsado og usa ka homemade .22 caliber nga armas nga dunay tulo ka mga buhing bala.
Sa report sa Police Station 5, usa ka concerned citizen ang nanawag sa police station labot sa armadong tawo.
Nahibaw-an nga gadala-dala og armas ang dinakpan human nigimaw ang pul-an sa armas dihang aksidenteng napukas ang iyang sinina. Giingong nagdala-dala og armas ang suspek aron proteksyon sa iyang kaugalingon human siya napusilan sa miaging buwan.
Nahibaw-an sab nga nabilanggo na kaniadto ang suspek sa kasong kalambigitan sa illegal nga drugas.
Kasong kalapasan sa Republic Act 10591 ang atubangon sa suspetsado. (BANAT NEWS)