Nailad sa text scam, napriso

CEBU, Philippines — Nagtingkagol sa prisuhan ang usa ka 41-anyos nga babaye nga nagpa-cash in sa GCash sa usa ka tindahan sa Barangay T. Padilla apan wala nibayad hinungdan nga kini gidakop niadtong adlaw Lunes, Hunyo 24, 2024.

Ang suspetsado nga 41 anyos, residente sa Sitio Eagles, Barangay T. Padilla, siyudad sa Sugbo. Sa impormasyon sa Police Station 1 sa Cebu City Police Office ang maong dinakpan gipadakop sa biktima nga 44 anyos nga tagiya sa tindahan.

Matud pa sa reklamo, nagpa cash in ang suspek sa usa ka numero og P5 mil, apan wala kini mobayad. Tungod niini, gipadakop kini sa reklamante.

Sa pagsusi sa kapolisan, ang suspek niinsister nga wala pa kini nakadawat sa iyang “daog” nga gisaad sa tawong tag-iya sa numero nga ni text kaniya ug maoy iyang gipadad-an sa P5 mil.

Dihang gipangutana ang suspek kun asa niya kini nadag-an, kini miangkon nga wala siyay giapilan nga raffle o contest , apan gipadad-an siya og text nga nag-ingong nakadaog kini ug ma claim lang ang premyo kun mopadala siya og P5 mil.

Ang suspek miingon nga biktima ra sab siya sa hitabo. Ang kapolisan miingon nga posibleng nabiktima sa text cam ang suspek.

Mipahimangno karon ang kapolisan sa tanan bahin aning text scam nga moingong nakadaog sa raffle apan makuha lang ang premyo kun mopadala og cash sa ilang numero.

Subay niini, nagkanayon si Police Major Marvin Fegarido, Hepe sa Police Station 1 sa Cebu City Police Office nga susihon nila kung duna bay records sa laing mga police stations ang 41-anyos nga babaye. --  IBM BANAT NEWS