“Sabog” ni-drayb og awto nga dunay mga bata

CEBU, Philippines — Usa ka lalaki ang nakamugna og kahasol sa mga tawo sa Tabunok sa Dakbayan sa Talisay human matud pa gimaneho ang awto nga gipaayo diha sa usa ka repair shop nga dunay sakay nga duha ka mga bata hinungdan sa pagtuong nangidnap kini.

Nahitabo kini niadtong Lunes sa buntag. Matud pa kalit nga gimaneho sa maong lalaki ang puwa nga awto. Naa diay sa sud sa awto ang duha ka batang lalaki nga edad 5 ug 6 anyos nga anak sa pintor sa maong shop nga higala ra sab sa suspek. Matud pa mi-counterflow sa dalan ang suspek ug nakasaghid kini og laing sakyanan. Maayo nalang nga dunay nag-roving nga mga polis nga daling nigukod kaniya hangtud nga napahunong kini sa mga traffic enforcers sa CT-TODA. Dihang gipangutana sa traffic enforcers ang mga bata, mitug-an sila nga wala sila makaila sa maong lalaki hinungdan nga gidakop nila kini ug gidala ang mga bata.

Hinuon pagabot sa tagiya sa shop ug sa amahan sa mga bata miangkon sila nga nakaila sila sa suspek. Apan ang ilaha lang, wala kini nananghid pagdala sa sakyanan.

Sumala pa ni Jonathan Tumulak, ang pangulo sa CTTODA ang maong driver gihulagway nga sabog o ubos impluwensiya sa illegal nga drugas. Ang mga bata gihatag na ngadto sa ilang amahan samtang ang suspek gi-turnover nila sa kapolisan.

Apan ang manager sa repair shop nga si Isot Pahayahay, nitug-an nga trabahante nila kaniadto ang maong lalaki apan tungod kay ligoy , wala na kini magtrabaho ug nag estambay nalang duol sa shop.

Gitug-an sab ni Pahayahay nga nag-praktis og drayb ang suspek apan wala kini mananghid. Hinuon gipasaylo ra nila kini ug giako ang gastos sa mga nadasmagan niining mga sakyanan.

Dili sab sila buot mopasaka og kaso batok sa suspek kinsa gusto sa manager nga papaulion nalang sa ilang probinsya. Apan ang hepe sa Talisay City Police Station Police Lt. Col Epream Paguyod nibutyag nga bisan og gawasnon na ang maong lalaki ilaha kining paimbestigahan tungod sa report nga tigamitan kini og ginadili nga drugas.-- IBM BANAT NEWS