Pag-ugmad sa lampposts sa CBRT gipahunong

CEBU, Philippines — Si Cebu City Acting Mayor Raymond Alvin Garcia mimando nga ipahunong ang padayong pagpabarug sa kontrobersiyal nga street lights sa Osmeña Boulevard ug ipaibot usab kadtong napabarug na  tungod kay peligro kini sa mga motorista  ug sa mga pedestrian.

Ang maong street lights kabahin sa Port to Link Project nga iya sa National Government ubos sa Cebu Bus Rapid Transit.

Ang maong proyekto kabahin kini sa Pedestrianization program sa Cebu City.

Maghimo og pedestrian lane ug bike lane ang 1.15 kilometros gikan sa Plaza Independencia hangtud ngadto sa may Eskina P. Del Rosario.

Apan giklaro ni Garcia nga ‘in principle’ ang iyang gihatag nga pagtugot kay kinahanglang mosubay gihapon sila sa proseso sama sa pagpananghid ug kun tugotan sa konseho sa dakbayan.

Gikatakdang tiguom ni Garcia ang mga opisyal sa CBRT ug uban stakeholders aron matuki ang maong isyu.

Una niini, si Konsehal Jocelyn Pesquera mibutyag nga ang kontraktor sa maong proyekto wala mokuha og business permit ug wala sila mananghid sa konseho. (BANAT NEWS)