CEBU, Philippines — Duha ka mga empleyado sa Cebu City Disaster Risk Reduction and Management Office ang gisugdan na sa pag-imbestigar nunot sa alegasyong nalambigit sila sa giingong kinawatay og gasoline ug krudo sa maong buhatan.
Kini naukay human dunay mga kawani sa maong departamento ang misumbong sa buhatan ni Konsehal Pastor Alcover sa milabay nga semana ug naabot na usab sa buhatan ni acting Mayor Raymond Alvin Garcia.
Matud pa ni Garcia, nakadawat na siya ug initial report gikan sa buhatan sa CCDRRMO, ug agi og pagsubay sa due process kinahanglan nilang maghimo og imbestigasyon batok sa maong giingong nalambigit sa anomaliya.
Sumala pa ni Garcia aron dili sila makapanglawgaw sa imbestigasyon gidid-an una sila sa pagtambong sa trabaho.
Gitug-an ni Garcia nga magpabilin pa gihapon nga pangulo sa CDRRMO si Harold Alcontin ug wala pa siyay gihulip niini.
Gipasalig usab ni Garcia nga iyang protihian ang mga whistleblowers sa maong anomaliya. Magpabilin ang maong mga empleyado sa ilang trabaho.
Gipadayag usab ni Garcia nga daghan na sab ang niduso og letter of intent kung nganung dili sila angay putlan og alokasyon sa petrolyo human ang acting mayor misuspenso sa tanang fuel allocations sa tanang mga sakyanan nga iya sa siyudad gikan sa mga department heads ug kabarangayan. (BANAT NEWS)