Top 7 Most Wanted sa kasong pagpatay nadakpan

CEBU, Philippines — Nasikop sa mga tinugyanan sa balaod ang usa ka 34-anyos nga lalake pinasikad sa warrant of arrest sa Nivel Hills Barangay Lahug, Siyudad sa Sugbo, Huwebes sa gabie, Hunyo 20, 2024.

Ang akusado mao si alyas Melvin, 34 anyos, residente sa Purok 6, Barangay Balagunan, Sto. Tomas, Davao del Norte.  Nabutang ang dinakpan isip Top 7 most wanted person Municipal Level.

Ang mga personnel sa Mabolo Police Station uban ang Sto. Tomas Municipal Police Station, Davao Del Norte PIT, RID 11, Metro Cebu CIT-RIU-7, PIDMU, DNPIU ug 2nd DNPMFC nagpahigayon og joint manhunt operation arrest batok sa akusado.

Ang warrant of arrest niini gi-isyu ni Assisting Judge Hon. Carmel Gil Grado sa Regional Trial Court, 11th Judicial Region, Branch 4, Panabo City, Davao del Norte sa kasong frustrated parricide, murder or homicide (RPC Art 250) nga gi-issue niadtong November 18, 2021 ug wala'y piyansang girekomendar.

Kasamtangan nga nabilanggo sa Mabolo Police Station 4 ang akusado ug ibalhin kini pabalik sa hurisdiksyon sa Davao  Norte aron ipresentar ngadto sa nag-isyu nga korte.--Decemay P. Padilla/IBM

WAY PERMIT?.. Gipasalig sa kontraktor nga nagbuhat sa Link to Port Project nga maoy nagmuntar aning mga lamp post sa kadalanan sa Cebu City nga ilang hikayon ang permits bahin niini nga nahimong unod sa komentaryo ni Konsehal Jocelyn Pesquera sa nakalabay nga semana.