Digitalization sa OBO nakapadako sa koleksyon niini

CEBU, Philippines — Mokabat og P86 milyones ang nakolekta sa Office of the Building Official gikan sa Enero hangtud sa Hunyo 2024.

Mas taas kini ug 10 porsiyento kun itandi sa nilabay nga tuig 2023, kini ang gibutyag ni Architect Florante Catalan, ang pangulo sa OBO ngadto sa iyang taho kang Acting Mayor Raymond Alvin Garcia.

Karon tuiga niabot ngadto sa P86.845 milyones ang nakolekta sa OBO mas taas kini sa nilabay nga tuig nga niabot lang sa P78.723 milyones. Nisaka ang unom ka buwan nga koleksyon ngadto sa 10.32percent ang labaw karon tuiga.

Ang kita sa OBO nakolekta gikan sa bayad sa mga naglukat og building permit, electrical, occupancy, demolition ug uban pang permits nga naglambigit sa mga edipisyo nga naa sa hurisdiksyon sa Cebu City .

Gipadayag ni Catalan, dako ug tabang sa pagsaka sa ilang collection ang pagpasayon nila sa proseso sa pagkuha sa mga permit sa tawo ug sa digitalization. 

Gitug-an usab ni Catalan, nga maayo usab ang dagan sa ekonomiya sa siyudad sa Sugbo. (CEBU NEWS)