CEBU, Philippines — Patay ang usa ka babaye samtang samaran ang kapuyo niini ug usa ka bata nga gituohang ilahang anak human natagak sa pangpang ang ilang gisakyang “tangkal-tangkal” diha sa Sitio Mangga, Barangay Campo 4, Dakbayan sa Talisay.
Si Konsehal Geraldine Bregondo-Ylaya, chairman sa disaster resiliency sa Barangay Campo 4 nagkanayon nga ang manguykoyay og bas sa ilang dapit maoy nakasumbong kanila labot sa lalaking samaran nga ilang nakita kagahapon sa alas 10 sa buntag.
Nisumbong sila ngadto kang Ylaya ug inubanan sa Community First Responder (CFR) ilang gitabang ang lalaki nga nakuhaan og ID nga nagpangalan og Jerome Sabal.
Gibana-bana nga sila natagak sa pangpang nga adunay gilawmon nga 200 metros. Nagtuo sila ni Bregondo nga gabii pa sa Hunyo 20,2024 nahitabo ang disgrasya.
Ang duha luwan og tangkal-tangkal nga traysikol nga gimaneho sa lalaki giingong naglihay-lihay sa nagtagak-tagak nga bato apan gituohang nawad-an kini og kontrol sa manobela ug nalahos sa pangpang.
Ang babaye nga wala pa mailhi nagsangit-sangit sa kahoy ug mga bato pero ang lalaki nga si Sabal ang nalahos sa dapit sa sapa.
Si Kapitan Rowena Edar-Briones sa Campo 4 nipahibawo nga sa pagsusi sa mga sakop sa City Disaster Risk Reduction and Management Office (CDRRMO) mibutyag nga dunay usa ka masuso nga gibanabanang usa pa ka tuig ang pangidaron ang ilaha sab nabangalan atol sa search and rescue operation.
Ang masuso nakaangkon lang og bun-og sa lawas ug luwas ra kini sa kuyaw nga kahimtang.
Ang pamilya giingon nga padung unta mangumpra og isda sa Barangay Tabunok adtong tungora apan naaksidente.— IBM BANAT NEWS