P10 milyones nga shabu nasakmit sa MCPO

CEBU, Philippines — Mokabat kapin sa P10 milyones nga balor sa ilegal nga drugas ang nasakmit sa managlahing anti-drug operation sa Kapolisan sa Police Regional Office ( PRO)7 didto sa Syudad sa Mandaue ug Syudad sa Sugbo. Ang hiniusang pwersa hiniusang pwersa sa City Intelligence Unit og City Drug Enforcement Unit sa Mandaue City Police Office ug sa PDEA 7 didto sa M. Logarta St. Barangay Subangdaku milusad og operasyon  alas  10:30 Miyerkules sa gabii.

Ang dinakpan mao si Lolita Labajo Parba a.k.a. Lolit, 46, residente sa Kimba, Brgy. San Roque, Syudad sa Talisay nga gikonsiderar nga high value individual.

Nakuha gikan kaniya ang 1,025 gramos sa giingong shabu nga mobalor dul- an P7 milyones. Matud pa ni Parba sa Banat News nga niadtong katapusan sa bulan sa Mayo nagsugod sa illegal nga kalihokan ang suspek kay wala siyay laing panginabuhi.

Sa susamang adlaw ug oras ang Drug Enforcement Unit Unit sa Police Station 1 sa Mandaue City Police Office nakasakmit usab og 400 gramos sa gituohang shabu nga mobalor kapin sa P2 milyones sa Tribunal, Brgy. Centro. Ang dinakpan mao si Christian Oliver Tabuco a.k.a"Yan-Yan," 22, residente sa CICC, Brgy. Guizo, Mandaue City.

Samtang ang Drug Enforcement Unit sa Guadalupe Police Station 9 sa Cebu City Police Office (CCPO) nakakompisaka usab og 100 gramos sa gituohang shabu nga mobalor og P680 mil atol sa buybust operation sa Sitio San Roque, Banawa,  Brgy. Guadalupe, Cebu City pasado alas 10:55 susamang adlaw. Ang suspetsado giila nga si Junjie Baclayon Sabandal alyas Bilat, 38, residente sa maong lugar.

Samtang nadakpan sab sa Purok Limonsitio, Barangay Dumlog, Dakbayan sa Talisay niadtong miaging adlaw ang 27 anyos nga taga Barangay Mambaling, Syudad sa Sugbo nga nakuhaan 35 gramos nga  shabu gibana-bana nga balor nga P238 mil. (BANAT NEWS)