Kanhi Negros Oriental governor Teves nisurender ug nakapyansa
CEBU, Philippines — Ni-surrender si kanhi Negros Oriental Governor Pryde Henry Teves sa Criminal Investigation and Detection Group (CIDG) Negros Oriental Provincial Field Unit.
Gi-implementar sa kapolisan ang iyang warrant of arrest sa kalapasan sa The Terrorism Financing Prevention and Suppression Act of 2012 kagahapon sa buntag, Hunyo 20, 2024.
Segun sa CIDG Negros Oriental Provincial Field Unit dihang nahibaw-an nila nga duna kini warrant niadtong Miyerkules gipangita nila si Teves apan wala nila kini makit-i.
Posible nga dihang nasayod si Teves nga gipangita kini sa kapolisan kagahapon sa buntag niadto siya sa buhatan sa CIDG Negros Oriental Provincial Field Unit ug boluntaryong mitahan sa iyang kaugalingon.
“Pag-abot niya diri sa office gi-serve namo ang warrant of arrest against sa iyaha”, suma pa ni Major Nazarino Emia, Offficer-in-Charge sa CIDG Negros Oriental Provincial Field Unit.
Ang warrant of arrest ni Teves dunay petsa nga May 13, 2024 diin si Hon. Marlon Jay Guillena Moneva, Presiding Judge sa Regional Trial Court Seventh Judicial Region, Branch 74, Cebu City ang nag-issue niini. Suma sa kapolisan, si Teves giisip nga “most wanted person sa Provincial Level No. 1 ug Regional Level No. 1.”
Hinoon, nakapiyansa dayon si Teves og P600,000 sa maong kaso ug wala na kini sa kustodiya sa kapolisan. (BANAT NEWS)
- Latest
