Drayber sa habal-habal gidunggab patay sa menor

CEBU, Philippines — Patay ang usa ka lalaki human kini dunggaba sa usa ka menor de edad diha sa  P. Vasquez St. Luan-Luan, Barangay Poblacion 1, Lungsod sa Carcar niadtong Martes sa gabii.              

Ang biktima mao si Cris Julius Barangan, 39-anyos, drayber sa habal-habal samtang ang suspetsado usa ka 17-anyos, grade 9 student. parehong lumulupyo sa nahisgotang lugar.

Gikataho nga sa wala pa mahitabo ang insidente ang biktima nagduwa kini og billiard ug pasado alas 10:00 sa gabii kalit kining gidunggab-dunggab sa menor gamit ang kutsilyo ug human sa pagpanunggab nisutoy kini og dagan.

Base sa imbestigasyon sa kapolisan sa Carcar Police Station nasayran nga adunay panagbangi ang duha kaniadto diin gi-agda sa biktima ang suspetsado nga mosakay sa iyahang motorsiklo apan nibalibad kini ug giingong gipitikan sa biktima ang dunggan niini.

Gikataho usab nga niadtong Hunyo 6 niining tuiga nisuway pagdunggab ang biktima ngadto sa suspek apan nakalihay kini.

Ang biktima daling gidala diha sa Carcar City Provincial Hospital apan gideklara kini nga patay na nga naabot sa maong tambalanan.

Ang suspetsado nasikop atol sa hot pursuit operation sa kapolisan ug gikustodiya karon sa Carcar City Police Station.  —  Irish L. Laborte (BANAT NEWS)