CEBU, Philippines — Gibuksan sa Land Transportation Office-Central Visayas ang lain na usab nga extension office diha sa barangay East Poblacion dakbayan sa Naga kagahapon, adlaw nga Huwebes.
Ang kalihukan gitambongan sa mga dagkong opisyal sa LTO, Atty. Vigor Mendoza II, LTO Assistant Secretary uban nila ni LTO-7 RD Glen Galario; Naga City Mayor Valdemar Chiong ug private proponent niini nga si Dave Baldoza.
Nasayran ang private proponent nisumiter kini ug intention ngadto sa buhatan sa LTO-7 alang sa ilang tinguha nga makabaton ug extension office ang ilang pasilidad nga giduso usab ngadto ni RD Galario sa ilang ulohan nga buhatan alang sa approval.
Matud pa ni Baldoza, isip pagtabang sa Nagahanon ug sa mga kasikbit nga lungsod nga mapadali ang proseso sa ilang paglukat og mga driver’s license hinungdan nga ilang giduso ang ilang property alang sa maong extension office.
Dugang niini nga mas makalikay usab ang mga taga Naga ug silingan nga lungsod sa trapik sa pagbiyahe-biyahe aron lang molihok sa ilang mga lisensya.
Si Regional Director Galario nibutyag ang Naga Extension nagtanyag og serbisyo nga naglakip sa pag process sa student permits, bag-o nga driver’s license, renewal sa driver’s license ug renewal sa vehicle registration.
Ang maong extension office maoy ikalima nila nga gibuksan ug mapaabot nga aduna pay mga dapit dinhi sa Central Visayas ang ablihan aron mas mapaduol kini sa katawhan ug walay rason nga magbiyahe sila nga way lisensya ug rehistro ang ilang mga sakyanan.
Si ASEC Mendoza sa iyang bahin mapasalamaton sa kaaktibo sa LTO-7 tungod kay mao kini ang buhatan sa tibuok LTO sa nasud ang adunay daghan nga gibuksan nga extension offices. (BANAT NEWS)