20-anyos patay human nibangga ang motorsiklo sa dump truck

CEBU, Philippines — Patay ang usa ka 20-anyos nga lalaki human nibangga ngadto sa dump truck ang gimaneho niining motorsiklo kagahapon sa buntag diha sa national road sa Barangay Poblacion, Lungsod sa Liloan.

Ang biktima mao si Fel Rydge Pepito, residente sa Purok Kaimito, Barangay Poblacion samtang ang drayber sa dump truck mao si Ariel Caramihan Claro, 27-anyos, taga Lungsod sa Minglanilla.

Base sa imbestigasyon sa Liloan Municipal Police Station nga giingong ang biktima nakainom wala kini magsul-ob og helmet ug kusog nga nagpadagan sa motorsiklo.

Gikataho nga ni-counter flow ang biktima sa pikas lane hinungdan nga nibangga kini ngadto sa dump truck.

Daling gidala diha sa Danao District Hospital ang biktima apan gideklara kining patay na nga naabot sa maong tambalanan.

Samtang ang drayber sa dump truck gitanggong kini diha sa Liloan Police Station. — BDB BANAT NEWS