CEBU, Philippines — Gitinguha sa buhatan sa Housing Urban and Development Office (HUDO) sa siyudad sa Mandaue ang pagbalhin na karon sa mga biktima sa sunog nga temporaryong nagpuyo sa Cebu International Convention Center (CICC) compound.
Sila giplanohan nga ibalhin ngadto sa transitory housing nga gitagana sa kagamhanan sa Siyudad sa Mandaue nga nahimutang usab duol sa maong dapit.
Si HUDO in-charge Karlo Cabahug miingon nga natakda na nila ang pagahimoon nga orientations sa mga beneficiaries sa maong proyekto.
Dugang pa niya nga ang orientation maoy giagad sa transition process alang sa paghatag kanila og giya ug sa pagatumanon nga mga polisiya sa temporary housing nga ilang balhinan.
Si Cabahug miingon nga magsugod ang pagbalhin sa mga settlers niining bulan sa Hunyo ug giandam na usab ang pagahimoon nga groundbreaking ceremony sa bag-ong city hall ug sa tukoron nga government center sa CICC compound.
Kahinumdoman si Mandaue City Mayor Jonas Cortes miingon nga tinguha nila nga pagahimoon ang groundbreaking ceremony sa tukoron nga government center sa Agosto ning tuiga isip kabahin sa mga kalihokan sa Charter Day Anniversary sa siyudad. (BANAT NEWS)