Mga iresponsableng pet owner pabayaron og multa

CEBU, Philippines — Mga iresponsable nga tag-iya og iro pahamtangan na unya og multa kong makita nga aduna sila’y mga kalapasan sa ilang mga binuhi nga kahayopan.

Kini ang gibutyag ni Dr. Alice Utlang, city veterinarian sa Dakbayan sa Sugbo ug kasamtangan nga pangulo sa Department of Veterinary Medicine and Fisheries.

Matud ni Utlang nga kadtong mga iro nga anaa sa kadalanan nga adunay mga nindot nga barug ug himsog nga dili ma-locate ang mga tag-iya ilaha kining dakpon.

Ug ang mga iro nga madakop ilaha kining bakunahan, spray-han og pintal dayon buhian diha sa lugar diin kini madakpi.

Si Utlang nagkanayon nga ang maong mga iro manguli kini sa ilang mga tag-iya hinungdan nga mailhan unya ang tag-iya niini ug isyuhan nila og citation ticket aron makabayad og multa.

Si Utlang nagkanayon nga dili nila iimpound ang mga iro tungod kay nakahibawo siya nga aduna kini mga tag-iya ug gipasagdahan lang kini.

Dugang ni Utlang nga ang padayong pagpabaya sa iresponsableng pet owner sama sa wala pagpabakuna sa ilang mga binuhi, magpakalibang sa gawas nga dili hiposon, nakapaak ang ilang iro ug gipasagdan lang makabayad sila og multa niini. (BDB) BANAT NEWS