CEBU, Philippines — Napun-an og 303 ka mga polis ang Police Regional Office (PRO)-7 human sila nakakompleto sa mandatory Public Safety Basic Recruit Course (PSBRC) niadtong Miyerkules, Hunyo 12, 2024.
Kini human sa ilang graduation ceremony diha sa Regional Training Center, Camp Jessie M. Robredo, Barangay Jugan, Lungsod sa Consolacion nga sinugdanan sa ilang karera sa Philippine National Police.
Ang seremonya gitambungan ni PRO-7 Director Brigadier General Anthony Aberin kinsa mipaabot sa iyahang pahalipay sa tanang graduates sa PSBRC Batch 2023-01 Classes Alpha to Foxtrot "ISAIAH."
Gipahinumduman ni Aberin ang mga bag-ong polis nga magmatngon sa ilaha na unyang field training program ug i-apply ang mga nakat-unan sa training institution.
"Continue your enthusiasm in achieving your goals and never stop learning as you represent the next generation of the Able, Active, and Allied Central Visayas police force. Strive to be the best version of yourselves and provide exemplary public service to the community with a smile," ni Aberin pa.
Ang PSBRC Batch 2023-01 Class *ISAIAH" gilangkuban sa 61 ka babaye ug 242 ka lalake.
Gasugod ang ilang training niadtong Nobiyembre 13, 2023 ug nakompleto kini Hunyo 12, 2024 ubos sa class name "ISAIAH" nga nagpasabot og 'Innovative Servants Aiming to be the Inspiration of Advocacy and Hope.'
Human sa culmination sa ilang training, mopaubos sila og orientation sa dili pa magsugod sa unom ka buwan nga Field Training Program.
Sa pikas bahin, dugang 50 ka mga polis sa Mandaue City Police ( MCPO) ang nakakompleto sa ilang pagbansaybansay aron mamahimong mga imbestigador. Ang maong mga polis nakahuman sa ilang Criminal Investigation Course niadtong miaging adlaw. Si Mayo Jonas Cortes mihatag og pasidungog kanila nga naglakip sa Award of Commendation, Award of Merit, Academic Award, Award of Excellence ug uban pa. (BANAT NEWS)