P5.5 milyong tabang pinansyal ihatag sa Kapitolyo sa siyudad sa Toledo

CEBU, Philippines — Moabot sa P5.5 million ang madawat nga tabang pinansyal sa siyudad sa Toledo gikan sa Probinsiya sa Sugbo alang sa gipahigayon nga Hinulawan Festival. Si Gobernador Gwendolyn Garcia nipahibawo niini atol sa iyang pagtambong sa maong kalihokan sa Toledo diin ang LGU makadawat og P3 million isip subsidiya sa socio-cultural nga gasto samtang ang lima ka contingent gikan sa mga gi grupo nga barangay makadawat og tag P500,000.

“Hangyoon ko kamo, Toledonhon, ayaw pakyasa kining talagsaong higayon. You are already a multi-awarded city in the entire Philippines. Nailhan na kamo nga karon nag-una, matuod gayud nahimong sumbanan sa tibuok probinsiya. Ayaw og balik niadtong higayon nga nagkabuak-buak,” segun pa ni Garcia.

Si Toledo City Mayor Marjorie Perales nagpasalamat sa gobernador sa suporta niini sa siyudad ilabina sa pag-establisar og mga programa alang sa kabatan-onan sama sa Pasigarbo sa Sugbo.

Ang Hinulawan Festival usa ka relihiyosong selebrasyon matag Hunyo 12 sa dakbayan sa Toledo pagpasalamat sa patron sa siyudad St. John of Sahagun. Ang Hinulawan nga termino nag gikan sa pulong nga "hinaguan" ug "bulawan.

Ang siyudad sa Toledo maoy mining capital sa Sugbo nga adunay mining area nga 1,674 ka ektarya. (BANAT NEWS)