Mga police station sa Cebu City hatagan og patrol car

CEBU, Philippines — Ihatag sa Cebu City government ngadto sa Cebu City Police Office (CCPO) ang bag-ong mga police car nga magamit sa dili pa ang Palarong Pambansa 2024.

Matud ni Cebu City Acting Mayor Raymond Alvin Garcia nga gumikan kay ni-request og dugang police cars ang CCPO nipalit ang kagamhanan sa siyudad.

Ang 11 ka police stations sa CCPO hatagan og bag-ong mga sakyanan nga automatic kini aron dili maguba dayon ilabi na lain-lain ang mogamit.

Gusto ni Garcia nga sa Palarong Pambansa 2024 daghang polis ang makita diin sobra sa 20 mil ka atleta uban ilang pamilya ang gilaoman nga moanhi sa Sugbo.

Ang kagamhanan sa siyudad nigahin kini og P8 milyones nga pundo alang sa pagpalit og mga bag-ong sakyanan.

Nasayran nga gikuha gikan sa peace and order program sa siyudad ang nahisgutang pundo.

Subay niini, si Police Colonel Ireneo Dalogdog, director sa CCPO mapasalamaton sa suporta nga gihatag sa kagamhanan sa siyudad ngadto kanila.

Gihulagway ni Dalogdog nga dako kini og tabang aron mamentinar ang kahapsay ug kalinaw sa dakbayan.

"Usa sa iyahang marching order kining police visibility, kining police cars dako kaayo ni og tabang para sa kahapsay ug kalinaw sa siyudad sa Sugbo", padayag ni Dalogdo.

Ang pagpahibawo sa paghatag og bag-ong police cars sa CCPO gitunong atol sa pagsaulog sa kagamhanan sa siyudad sa ika-126th  nga kasumaran sa adlaw sa kaugalingnan. (BANAT NEWS)