Mga babayeng gwapa gipanumbag

CEBU, Philippines — Nabun-og ang nawong sa usa ka 37-anyos nga lalake human nakulatahan sa mga tambay tungod kay kalit lang kining nanukmag sa mga gikasugat niyang babaye niadtong adlaw'ng Domingo, Hunyo 9, 2024.

Una niini, tulo ka babaye ang nabiktima sa maong lalake nga wala'y permanenteng address.

Nasayran nga alas 6:35 sa gabie sa adlaw'ng Domingo, Hunyo 9, ang 33 anyos nga babaye naglakaw sa dalan D. Jakosalem aron mouli sa dihang nasugatan ang suspek ug bisan wala niya unsaa, gikalitan siya niini og siko ug naigo ang iyang wala nga mata. Nakahilak sa kasakit ang biktima maong nangita kini og kasumbongan.

Dayon alas 6:40 sa gabii laing babaye na usab ang nabiktima ug ning higayuna ang 20-anyos nga si alyas Macy kinsa lipay unta kaayo kay bag-o pang nakapasar sa iyang NC III Bookeeping sa TESDA.

Kay imbes “congratulations” ang iyahang nadawat gikan sa mga kahigalaan tungod sa iyang kalamposan, “get well soon” na hinoon ang iyahang nadawat tungod sa insidente.

Sigon sa biktima pagkanaog niya sa pasaheroan diha sa Fuente Osmeña gitangtang niya iyahang eyeglasses kay nag moist ug wala na siya'y maklaro.

Apan samtang galakaw nakabantay siya nga naa siya'y gikasugat. Nagpapidpid siya apan ang suspek nagpapidpid sab ug dihang duol na sila largong gisumbag iyahang ilong hinungdan nga kini nabuak.

Si alyas Macy walay nahimo kondili ang pagpauli ug gi-post niya sa social media ang iyang kasinatian, nag viral kini, sama sa unang biktima mopasaka sab siya og kaso aron dili na makabiktima og lain ang suspetsado.

"Desidido gyud mo file og kaso kay kana bitaw dili deserve nga ma experience ang ingon ani, especially kanang ganahan maglakaw-lakaw, ako ganahan gyud ko maglakaw-lakaw pa school to amoa lakawon ra nako usahay kay relaxing pero karon ambot magpanglingi nako," sigon pa sa 20-anyos nga biktima.

Ang unang biktima nagtinguha sab gyud nga ipapriso ang suspek.

"I hope ma priso siya.. (Na-trauma) actually paggawas nako sa balay nakulbaan nako, dili gyud ko mogawas basta wala pa ang sakyanan nga mokuha...To be honest pag makatagbo ko’g mga lalake mahadlok na gyud ko," saysay sa unang biktima.

Apan dili lang si Macy ug ang unang biktima ang nakatilaw sa pagdagmal sa maong lalaki, kay nianang alas-7 sa gabii ang 22-anyos nga babaye na sab nga nag jogging kuyog sa iyahang higala diha sa Fuente Osmeña Circle maoy natripingan sa suspek. Gikan sa dalan B. Rodriguez, milabang ang biktima ug sa iyang pag-abot sa parking area sa usa ka sa paanakan sa dapit didto kalit siyang gisumbag ug naigo ang iyahang wala nga mata.

"Natulala ko, if wala ‘to akong friend manglingkod ra guro ko sa sawog kay natumba man gyud ko. Unya usa nalang ka kamot akong na-balance niya niana akong friend mata diha barog kay mangita ta og hustisya nimo og kinsa to," saysay pa sa 22-anyos nga biktima.

Gumikan kay dili na siya gusto nga naa pay laing mabiktima mopasaka gyud siya og kaso.

Tungod ani nga mga reklamno nipadala dayon ang Abellana Police Station og mga sakop diha sa lugar.

Sigon ni Police Major Mark Don Alfred Leanza, hepe sa Police Station 2 sa Cebu City Police Office ang suspetsado nadakpan nila ni Patrolman Jurdine Franco ug Patrolman Johncelle Francisco diha sa B. Rodriguez. "Actually giparespondehan na gyud nato kay niari naman si victim no. 1 sa atoa and then igo pud ang atoang mga police naa ra sa AOR which is very highly populated area di gyud makaatiman huwat lang gyud og tawag from Police Station, kato pagtawag nga respondihi ni ninyo giadto dayon sa atoang tropa mao to nakuha dayon ang suspek through the help of the citizens sa area kay ilaha man gi-hold daan," asoy ni Major Leanza.

Ang suspetsado positibo nga gitudlo sa mga biktima nga maoy naghimo sa krimen.  Gisuwayan og kuha ang habig sa suspetsado apan wala kini moatubang sa mga tigbalita.

Apan dihang gipangutana kini sa mga kaubang piniriso kung nasuko ba kini sa mga babaye, kini miingon nga dili siya ganahan og gwapa nga babaye kay ‘fake.‘

Kasong multiple serious physical injury ang gipasaka batok sa suspetsado. – IBM BANAT NEWS