CEBU, Philippines — Nahipos sa kapolisan sa Lapu-Lapu City Police Office (LCPO) ang 321 ka mga minor de edad nga nakalapas sa curfew.
Ang curfew gipatuman para sa mga minor nga magsugod sa alas 10 ang takna sa gabii hangtod sa alas 4 ang takna sa kaadlawon human sa daghang mga krimen nga gikalambigitan sa maong mga batan-on.
Ang maong gidaghanon ilang nahipos sa usa ka semanang operasyon sa sugod niadtong Hunyo 1 hangtod sa Hunyo 7, 2024.
Ang mga minor naabtan sa gawas (kadalanan) nga walay kuyog nga ginikanan o mga hingkod og panuigon nga walay tataw nga katuyoan gawas.
Sagad nila nagkuyogkuyog sa ilang mga baarakada nga way klarong tumong diha sa gawas.
Si Police Lieutenant Christian Torres, tigpamaba sa LCPO miingon nga ang mga minor ilang gitugyan ngadto sa barangay halls ug ang mga barangay tanod na ang mitugyan kanila ngadto sa mga ginikanan human sa briefing sa mga personnel sa City Social Welfare and Services Office.
Samtang sa Talisay City, 38 ka menor de edad sab ang nahipos sa kapolisan niadtong nakalabay nga Sabado ug Domingo tungod sab sa paglapas sa curfew ordinance sa siyudad.
Ang kapolisan nihimo sa foot patrol sa Barangay Poblacion, Maghaway, Tapul nga diin dunay daghang mga tawo nga magtapok bisan lawom na ang kagabhion.
Ang mga menor de edad gi turn-over ngadto sa GAD Focal Persons sa matag barangay kung asa sila nagpuyo.
Sila nasab ang mohatag og intervention sa mga na-rescue nga kabataan nga dili na mousab sa paglaroy-laroy sa lawom nga kagabhion. Ang curfew sa siyudad magsugod alas 11 sa gabii hangtud sa alas 4 sa kaadlawon. (BANAT NEWS)