CEBU, Philippines — Nakig-alayon ang kagamhanan sa siyudad sa Mandaue ngadto sa Cebu United Rainbow LGBT-Q sector ug United Nations Development Program sa pagpatuman og mga programa nga naglambigit sa paghatag og pagtagad sa mga LGBT-Q sa maong dakbayan.
Sa maong panag-alyansa ilang gituki ang mga proyekto ug programa may kalabotan sa pagpakabana ngadto sa LGBT-Q sektor sa dakbayan sama sa paghatag og unang pagtagad sa mga health programs alang sa nahisgutang sekor.
Nasayran ang Mandaue City aduna na kini napasar nga Anti-Discrimination Ordinance nga maoy nagpamatuod ug nagdasig sa patas nga pagtagad sa mga LGBTQ community sa maong siyudad.
Sa pag edukar sa katawhan sa pagdawat sa mga LGBTQ sa matag komunidad gipatigbabaw sa Mandaue City ang pagpadayag sa Sexual Orientation ingon man sa Gender Identity ug Gender Expression.
Subay niini gipasalig sa kagamhanan sa dakbayan ang paghatag og aksyon ug suporta alang sa LGBT-Q sector apil na niini ang pagsuporta sa mga Mandauehanon sa pagsaulog sa Pride Month niining bulan sa Hunyo. (BANAT NEWS)