‘Kabit’ gipusil patay sa bana

CEBU, Philippines — Usa ang patay samtang usa naangol sa nahitabong pagpamusil sa Purok 1, Barangay Cambinocot sa siyudad sa Sugbo pasado alas-2 sa hapon niadtong adlaw’ng, Biyernes, Hunyo 7, 2024.

Ang mga biktima nga sakay sa motorsiklo mao sila Jogie Goc-ong Batican,  residente sa Barangay Lusaran ug si Clyde Bitoon More, 25, nagpuyo sa Barangay Basak, Lungsod sa Compostela.

Sa impormasyon nga gibutyag sa Talamban Police Station base sab gisaysay More,  nag-angkas kaniya si Batican paingon sa Proper Cambinocot.

Nakabantay na silang daan nga dunay nagsunod-sunod kanila nga sakay sab og motorsiklo.

Sa dihang nakapaduol kanila ang duha, kalit matud pa silang gipusil  maong naigo si Batican sa likod kaduha ka higayon samtang si More naigo sa tuo nga bukton.

Si Batican nakabsan sa kinabuhi samtang si More nadala sa Vicente Sotto Memorial Medical Center.

Sa imbestigasyon sa kapulisan sa Talamban Police Station personal nga kasuko ang motibo sa maong krimen.

Nahibaw-an sa kapulisan nga ang namatay ug ang mamumuno kinsa nailhan na sa kapulisan duna nay panagbangi.

Gikataho nga selos ang posibleng motibo tungod kay Batican gipasanginlan sa suspek nga dunay relasyon sa asawa niini.

“Possible reason gyud ani is personal grudge dala na pud ni sa selos kay sa atong term pa gikabit ang asawa,” sigon ni Major Alvino Enguito, hepe sa Talamban Police Station.

Padayon pa ang hot pursuit operation sa kapulisan sa suspetsado kinsa daling misibat human sa krimen. (CEBU NEWS)