71-anyos nga lola napunggit sa trak patay

CEBU, Philippines — Patay ang usa ka 71-anyos nga babaye sa dihang nadasmagan kini og trak atol sa iyang paglabang sa dalan sa R. Duterte St., Banawa, Guadalupe, Dakbayan sa Sugbo pasado alas 4:37 Biyernes sa hapon niadtong Hunyo 7,2024.

Giila ang biktima nga si Paulina Pantonial Gonzales, 71, residente sa Sitio Maracaz, Lahug, dakbayan sa Sugbo.

Ang drayber sa trak nga nakadasmag sa tiguwang babaye giila nga si Edgar Despi Espinosa, 59, residente sa Mountain Breeze Subdivision, Tisa, Dakbayan sa Sugbo nga nagmaneho sa Fuso Canter nga adunay plakang KCY 542.

Sa inisyal nga imbestigasyon nga gihimo sa kapolisan, nasayran nga naa sa tunga sa karsada ang biktima kay nitabok kini padung sa pikas.

Ang drayber sa trak nga si Espinosa niasoy nga samtang nagbiyahe paingon sa Pavillion, nakita niya ang biktima sa dalan apan kalit lang kining na-out balance.

Nisuway una siya sa paglikay aron dili kini maigo pinaagi sa pagliko sa tuo apan naabtan gihapon kini sa wala nga side mirror sa iyang trak.

Tungod sa kakusog sa impact nalagpot sa sementadong dalan ang biktima ug nakaangkon og mga samad sa nagkadaiyang parte sa lawas. Ang biktima daling gidala sa Cebu City Medical Center pinaagi sa nirespondeng ambulansya apan gideklarar nga dead on arrival sa nag-atiman nga mga doktor. Kasamtangang gitanggong sa Traffic Enforcement Unit ang drayber sa trak nga si Espinosa ug nag-atubang og kasong Reckless Imprudence Resulting in Homicide.(BANAT NEWS)