CEBU, Philippines — Ang Department of Transport and Road Infrastructure Development sa Moscow nisugyot sa pagpaubos og partnership agreement tali sa Cebu City Government nga nagtumong sa pagbayloay og analytics sa mga kabahin sa transportasyon base sa taho ni Konsehal Jocelyn Pesquera.
Human sa biyahe ni suspended Cebu City Mayor Michael Rama uban ni Pesquera, Cebu City Tourism Commission head, ug Sister City Program Executive Director Karla Henry, ug uban pa ngadto sa Moscow niadtong Mayo 22 ngadto sa 25, 2024 si Pesquera nitaho sa resulta sa ilang delegasyon.
Sa usa ka sulat nga gi-endorso ngadto sa konseho diin si Pesquera nagkanayon nga ang ilang pagbisita ug pakigtagbo sa mga opisyal sa Department of Transport and Road Infrastructure Development sa Moscow malamposon ug mabungahon.
“In fact, they have proposed to enter into a partnership agreement with the Cebu City Government”, tipik sa sulat ni Pesquera.
Lakip sa mga prayoridad sa kasabotan sa partnership mao ang pagbinayloay sa labing bag-ong datos sa transportasyon.
Gawas niini, naglakip usab kini sa pagpahigayon sa online ug offline nga mga tigom lakip ang mga miyembro sa research experts nga komunidad ug ang pagpatuman sa mga research works.
Nasayran nga ang partnership nagtumong usab sa paghimo ug pagtuki sa kasamtangang sitwasyon sa transportasyon sa Siyudad sa Moscow ug Dakbayan sa Sugbo ug pag-ila sa pinakamaayong practices alang sa pagpaayo sa sitwasyon sa lokal nga transportasyon.
Ug nagtumong usab kini sa pag-ila sa prospects alang sa kalamboan sa industriya sa transportasyon ug sa paghimo sa usa ka accessible ug bukas nga kahibalo base sa sitwasyon sa transportasyon sa Siyudad sa Moscow ug Cebu City. — BDB BANAT NEWS