CEBU, Philippines — Nakit-an nga wala nay kinabuhi ang magtiayog senior citizens sulod sa ilang panimalay sa Barangay Labangon, Siyudad sa Sugbo sa miaging adlaw.
Ang bana nag-edad og 95 anyos samtang ang asawa niini kay 84 anyos.
Sa impormasyon sa Labangon Police Station sa Cebu City Police Office(CCPO) ang pag-umangkon sa magtiayon nibisita sa ilang balay, nagsige kini og panuktok apan wala'y migawas ug mitubag nga tawo.
Nisulod kini sa balay apan nanimaho na ug dihang milili kini sa bintana nakit-an niini nga gilangaw na ang duha.
Nasuta sa imbestigasyon sa kapolisan nga parehong adunay gihambing sakit ang magtiayon. Naka lock ang balay apil na ang kwarto diin namatay ang duha nga matud pa sa kapolisan indikasyon nga walay laing tawo nga nakasulod. Wala sav nawala ang gamit sa magtiayon sama sa mga alahas.
Girekomendar hinuon sa kapolisan nga ipa otopsiya ang mga lawas aron mahibaw-an gyud unsay gikamatyan nila. Nasayran nga wala'y mga anak ang magtiayon.
Samtang nadugta nga patay'ng lawas sa gituohang usa ka Amerikano ang nadiskubrehan sulod sa lawak sa panimalay nga iyang giabangan sa Lot 4, Block 20 sa Sitio Gisi, Barangay Agus sa Siyudad sa Lapu-Lapu alas-12 sa udto Mayo 5, 2024.
Si Police Major Christian Torres, tigpamaba sa LCPO miingon nga usa ka Florentino Arong Jr. nga liason officer sa Barangay Agus ang naghatod unta og summon sa maong American national tungod sa reklamo sa tag-iya sa panimalay nga milabay na ang pipila ka mga bulan nga wala kini makabayad sa iyang abang sa gipuy –an.
Sa paghiabot sa maong liason officer namatikdan dayun niini ang nagdugok nga mga lagong ug pwerteng bahoa sa palibot ug sa pagsusi patay na kini.
Dali nga gipahibalo ni Arong ang guard on duty sa maong subdivision ug gitaho usab kini ngadto sa buhatan sa kapolisan. Ang mga sakop sa Scene on the Operatives (SOCO)nga maoy naghimo og pakisusi sa hinungdan sa kamatayon niini. (BANAT NEWS)