Cebu City Hall adunay nagdawat og sweldo nga wala nagtrabaho?

CEBU, Philippines — Gihimakak sa department head sa Management Information and Computer Services (MICS) ang alegasyon nga nikatap diha sa social media nga adunay nagdawat og sweldo sa city hall apan wala motrabaho.  

Kagahapon, ang Cebu Updates nga usa ka social media page nipasangil sa post niini kabahin sa daily time record (DTR) nga “scam” sulod sa Cebu City Hall.

Partikular nga gitumbok sa maong post ang MICS department head nga si Dante Arcilla nga nailhan usab nga Dax Arcilla kinsa giingong nakadawat sila og tibuok nga sweldo nga walay entry sa biometrics sa DTR.

“Atong gihangyo ang Civil Service Commission ug Office of the Ombudsman nga tanawon ni ang DTR scam sa Cebu City Hall kay dili mahimo ni Dax Arcilla kon walay kakunsabo sa HRDO ug sa Opisina sa Mayor", tipik sa maong post diha sa social media.

Laing pasangil nga giingong adunay DTR record nga walay sulod ug ang nag-post niawhag usab og imbestigasyon batok kang Arcilla.

Sa iyang bahin, si Arcilla nagkanayon nga ang gilakip nga hulagway sa maong post ang record sa niaging tuig diin ang maong DTR usa ka dokumento nga wala pa ma-fill-out.

“Kabalo naka, politics. That is part of the process. Sa pagsugod sa imong DTR, it is always empty. Ang-ang naman og wa pa magsugod ang buwan naa nay sud”, ni Arcilla pa.

Matud ni Arcilla nga ang maong post walay balido nga basehan ug aduna kini nahimong kalapasan tungod kay gilakip sa post ang hulagway sa iyang mga anak.

Ug dihang gisusi sa The Freeman (igsuong publication sa Banat News) ang maong post alas 5:45 sa hapon kagahapon ang nahabilin hulagway na lang sa walay sulod nga DTR.

Si Arcilla nagkanayon nga ang nahisgutang post usa ka basehanan sa mga criminal offense ug itugyan niya kini sa law enforcement.

Giklaro ni Arcilla nga sa iyang naandan nga “never off work” diin nagtrabaho siya sulod 24 oras kada adlaw.

Ug personal siya nga mo-report ngadto sa mayor ug sa city administrator nga makapamatuod sa iyang pagtambong sa trabaho.

Giklaro ni Arcilla nga lakip sa iyang trabaho mao ang pagpahimutang sa saktong information infrastructure alang sa siyudad, saktong direksiyon sa aplikasyon ug sestema nga gamiton usab sa siyudad. (BANAT NEWS)