CEBU, Philippines — Ang kagamhanan sa Dakbayan sa Sugbo mopatuman og enhanced nga sestema alang sa bag-ong ID cards sa person with disability (PWD) diin maisyu kini sulod sa tulo ka buwan samtang ang mga indibidwal nga nalambigit sa binuang ipaubos sa imbestigasyon sa City Legal Office.
Tumong niini nga matubag ang taho sa giingong pagbaligya og mga pekeng ID sa PWD.
Niadtong Miyerkules gipahigayon ang executive session kinsa ang mga representante sa Management Information and Computer Services (MICS), Department of Social Welfare and Services (DSWS), Person with Disability Affairs Unit (PDAU) giimbitar aron mahatagan og katin-awan ang pagbaligya sa maong mga PWD ID pinaagi sa pagpahibalo sa konseho sa mga proseso niini.
Sayo pa, si Konsehal James Anthony Cuenco niluwat og privilege speech kabahin sa giingong pagpamaligya og mga PWD ID sa siyudad diin naabot ang maong taho ngadto sa iyang buhatan.
Si Portia Basmayor, officer-in-charge sa DSWS nihatag sa datos sa mga narehistro nga PWD sa siyudad nga anaa sa 26,159 diin gi-categorize kini nga chronic illness, communication disability, orthopedic, intellectual, learning, mental, multiple, psychosocial, visual, ug rare nga mga sakit.
Si Cuenco nibutyag sa mga tigbalita nga ang executive session gihimo sa tulo ka bahin diin ang unang bahin mao ang presentasyon sa DSWS diin usab giklaro sa konseho ang listahan sa mga kwalipikasyon sa pag-isyu sa PWD ID.
Human mahatag sa DSWS ang listahan alang sa categorization gisugyot nga ang pag-usab sa guidelines sama sa bag-o lang nga gipagawas sa Department of Health (DOH) nga walay labot ang pipila ka chronic disease nga mao ang diabetes ug hypertension.
Subay niini, si Cuenco nagkanayon nga kinahanglang maghimo sila og bag-ong guidelines aron ma-update ug ma-align ang maong kategoriya.
Gibutyag ni Cuenco nga ang DSWS niangkon sa pipila sa ilang “inefficiency” tungod sa ilang kakuwang sa connectivity ang usa sa hinungdan sa pagkatap sa mga pekeng ID sa PWD.
Samtang si Basmayor nagkanayon nga sa iyang pag-asumir sa posisyon niadtong Marso 2024 ang kanhi pangulo sa DSWS nipahibawo kaniya nga adunay mga isyu sa peke nga PWD ID.
Gipasabot ni Basmayor nga ang orihinal nga PWD ID adunay QR code nga kong ma-scan makita kong kinsa ang tag-iya nga narehistro sa sestema ug ang nag-encode sa mga detalye. (BANAT NEWS)