CEBU, Philippines — Mga tag-iya og sakyanan ug dealers subli nga gipanawagan sa regional director sa Land Transportation Office (LTO) sa Central Visayas Glen Galario sa pagkuha na sa ilang mga license plate. Matud ni Galario nga tanang nahabilin nga mga plaka mahimo na kining kuhaon.
Giawhag ni Galario ang mga dealer nga moadto sa ilang buhatan aron mokuha sa mga plaka o mo-request nga ipadala kini physical ngadto sa mga tag-iya. Ang mga tag-iya sa sakyanan mahimong mo-claim sa ilang plaka pinaagi sa pagsumiter sa OR/CR ngadto sa mga district office sa LTO ug ang LTO maoy mo-notify kanila kong ang ilang plaka mahimo nang kuhaon.
Gipadayag ni Galario nga gusto nilang matibhangan ang gidaghanon sa mga plaka nga anaa sa ilang buhatan diin gipaabot nila nga aduna pay mangabot gikan sa ilang ulohan nga buhatan. Niabot ngadto sa 488,241 ang gidaghanon sa plaka nga napagawas sa LTO-7 gikan sa Hunyo 2023 ngadto sa Mayo 2024. (BANAT NEWS)