CEBU, Philippines — Gilauman nga mahuman karong buwan sa Hulyo ang Guba Hospital nga taud taud na nga gi-ayo apan hangtud karon wa pa makompleto.
Kini human nipasalig ang contractor sa proyekto nga humanon kini atol sa tigum uban ni acting Mayor Raymond Alvin Garcia.
Apil sa tigum mao ang representante sa Department of Health ug pangulo sa City Health Department nga si Dr. Daisy Villa.
Sumala pa ni Garcia, human sa iyang seryoso nga discussion sa meeting didto gipasaligan siya sa contractor nga mahuman ang ilang trabaho sa tambalanan sa buwan sa Hulyo.
Ang acting mayor, mahinangpon kaayo sa maong kalambuan sa tambalanan sa barangay Guba, tungod kay mao kini ang dangpanan sa mga residente sa mountain barangays kon aduna silay mga medical emergency.
Gitug-an ni Garcia, nga iyang nasuta atol sa ilang tigum nga napakyas ang contractor sa pag proseso sa building permit ingon man aduna usab kini problema sa luna nga gitukoran niini.
Nanghinaut si Garcia nga wala nay problema nga motumaw ug wala nay rason nga malangay pa ang maong proyekto nga nagkantidad og P15.79 milyones nga gisugdan niadto pang tuig 2019. (BANAT NEWS)