CEBU, Philippines —Tutokan sa Cebu City Fire Station ang tuyong pagsunog sa usa ka tindahan diha sa Salinas Drive, Barangay Lahug, Siyudad sa Sugbo kagahapon sa kadlawon.
Ang maong panghitabo nakuha sa closed-circuit television (CCTV) diin nakita sa footage ang usa ka lalaki kinsa nagsul-ob og t-shirt, nagkarsones ug nagkalo ang niduol sa establisamento dayon aduna kini giduslitan ug gitagak ug human mahimo ang krimen dali kining nisibat palayo sa lugar.
Apan wala makadako ang kayo sa maong sunog tungod kay napalong ra dayon ang kayo.
Matud ni Senior Fire Officer 3 Wendel Villanueva, tigpamaba sa Cebu City Fire Station nga bisan og wala nakadako ang kayo sa sunog apan tutokan nila kini aron mailhan ug mapahamtangan og silot ang nahisgutang lalaki nga nakita sa CCTV footage.
"Ang atong mga arson investigator padayong nitutok niining kaso, niining tinuyong pagsunog sayo ganihang kadlawon, maayo nalang gani wala na kini makadako, natabang ra dayon kay nahitabo pa nga wala dayon mabantayan posible nakakatap ning maong sunog", padayag ni Villanueva.
Makig-alayon ang kabomberohan sa kapolisan aron matabangan sila sa pag-ila sa maong lalaki. (BANAT NEWS)