10-anyos nga nag-inusara napaig

CEBU, Philippines — Patay ng naugkat ang usa ka 10-anyos nga batang lalake sa naugdaw nga gipuy-an niini human sa pag-ulbo sa sunog sa A. Borja Street, Barangay Talamban, Siyudad sa Sugbo kagahapon sa alas-2 sa kaadlawon diin tulo ka panimalay ang naugdaw.

Apil sa napaig ang 10-anyos nga batang lalake nga si Nathan Jade Villamor kinsa nakatulog og maayo sa dihang niulbo ang sunog nga nagsugod sa ilang pinuy-anan.

Gikatahong wala diha ang inahan sa bata sa pagkahitabo, ang apohan nisayo sab og adto sa Carbon Public Market kay nanginabuhi.

Si Debbie Patigayon, usa sab sa nasunogan ug uyoan sa biktima nga gipukaw nalang siya sa iyahang inahan ug nakita nalang niini nga nasunog na ang balay kun asa natulog ang bata.

Dunay report ang nilakaw matod pa ang inahan kay nipalit og pagkaon apan wala dayon kini makabalik.  Gisuwayan og kuha og habig sa inahan sa bata apan nagdumili kini sa paghatag og pamahayag.

Nasayran nga buwag na ang inahan ug amahan sa bata, ang amahan naa sa kaulohan nanarbaho ug dihang nasayod sa nahitabo sa iyang anak miingon nga mouli siya.

“Sukad pa na sa gamay pa na akong anak naulian na nako isang higayon  diha nga gikan ko’g trabaho naulian nako’g kadlawon nga akong anak naghilak nalang diha sa pultahan sa balay…Magkuyog-kuyog sa iyang (inahan) barkada, mag-inom-inom,” sigon ni Christopher Jade Rabutan amahan sa bata sa interbyu sa mga tigbalita. Subay sa maong hitabo si Police Major Alvino Enguito miingon nga palawman nila ilang imbestigasyon nganong nag-inusara ra ang bata dihang nahitabo ang sunog.

“Atong palawman gyud ang imbestigasyon kung unsa katinood ba nganong nahabilin ning bata nga siya ra usa, wala ang mama...Among susihon og taman kay basig og dili rani kausa kay dili man katoohan nga naa siya’y gipalit unya alas 2 sa kadlawon so amo pa ning palawman ang imbestigasyon,” sigon ni Enguito.  Samtang gisusi pa sa kabomberohan ang hinungdan sa sunog kay wala’y kuryente ug solar lamp lang matod pa ang ilang gigamit sa maong balay.

Kandila ang usa sa gitan-aw nga hinungdan sa Cebu City Fire Office nga hinungdan sa sunog nga midanyos og P300,000. (BANAT NEWS)