Paghatag og insentibo sa board passers gipangandaman sa Talisay
CEBU, Philippines — Gipangandaman nang daan sa kagamhanan sa Dakbayan sa Talisay ang paghatag og pinansyal nga insentibo ngadto sa mga board passers.
Si Talisay City mayor Gerald Anthony “Samsam” Gullas nagkanayon nga kung basehan lang ang mga post sa social media daghan gyud ang nakapasar sa nagkalain-laing board examination.
Ang pinakauwahing resulta mao ang Licensure Examination for Teachers (LET).
Sa nasayran si konsehal Eduardo “Digul” Gullas III, chairman sa committee on education maoy nangamahan sa ordinansa nga dili lang topnotchers ang makadawat og insentibo kundi lakip na ang mga board passers.
Unang nakadawat sa insentibo mao ang 31 ka indibidwal nga ang resulta sa eksaminasyon nigawas sa buwan sa Enero, Pebrero ug Marso.
Gidawat nila ang tag P5mil niadtong buwan sa Abril samtang ang nipasar sa buwan sa Abril, Mayo ug Hunyo modawat sab sa insentibo karong buwan sa Hulyo. (BANAT NEWS)
- Latest
