CEBU, Philippines — Gipusil patay ang usa ka tomboy sa gawas sa ilang giabangan nga panimalay diha sa Sitio Bato Barangay Ermita sa Siyudad sa Sugbo pasado alas 2:35 kagahapon sa hapon Hunyo 3,2024.
Ang biktima giila nga si Nilma Booc Toting alyas “Tata,”45, residente sa Barangay Basak, Syudad sa Lapu-Lapu.
Matud pa ni Elett Nalzaro Anoba, 49, (kanhi kaipon sa biktima) giapas niya aron pakan-on ang biktima apan pag-abot niini dunay mibutho nga wala mailhing lalaki ug kalit nga kining gipusil gamit ang kalibre 45 nga pistola.
Dugang pa ni Anoba nga aduna pirme mangita sa biktima nga gihinganlan og “Kuya.”
Ang Scene of Crime Operation (SOCO) naka recover og usa ka empty shell sa kalibre 45 nga pistola og mga drug paraphernalia.
Si Police Major Philip John Lebris Hepe sa Carbon Police Station 5 mibutyag nga aduna na silay person of interest apan wala nila gibutyag kay nagpadayon pa ang ilang imbestigasyon.
Samtang napalgang patay ang usa ka lalaki nga adunay samad pinusilan sa iyang ulo diha sa Purok Paglaum sa Brgy. Ibabao, Cordova kagahapon alas 7:30 sa buntag.
Ang biktima giila nga si George Manatad Serafin, 40, residente sa Lower Sun-ok Brgy. Ibabao, Cordova. Matud pa ni Police Major Joffre Grande, hepe sa Cordova police station nga sa pasiunang imbestigasyon nasuta nga niaanang pagka alas 3:00 sa kaadlawon katapusang nakit-an sa iyang anak ang biktima nga milakaw.
Nasuta usab nila sa imbestigasyon nga ang biktima giingong nalambigit sa pagpamaligya og illegal nga drugas sa maong dapit. Dugang pa ang biktima bag-o lang nakabalik sa lugar gikan sa Mindanao ug giingong gitambagan kini sa ilang kabanay nga dili na mobalik sa Cebu ug hunongon na ang maong ilegal nga kalihokan apan wala kini mopatuo.
Ang scene of crime operation naka recover og usa ka basiyo sa bala sa wala pa matinong kalibre sa araas, giingon nga nahanaw ang cellphone sa biktima a nga posibleng gidala sa mamumuno.
Ang kapolisan aduna na say person of interest apan wala una kini gibutyag. (BANAT NEWS)